食唔停！全場280円的高性價比串燒居酒屋「鳥貴族」！

鐘意食串燒嘅朋友，去到日本當然會四處出没揾居酒屋，但係日本居酒一般都價錢遍高。想大吃大喝，但個銀包又要就住就住。點算好呢？！

去日本旅行嘅朋友，想食串燒食得盡情盡興，一定要識得呢間「鳥貴族」。呢間「鳥貴族」打住全品均一280円（未含稅）嘅低價，再望到餐牌上嘅精美食物相片，作為一位精打細算嘅食家，又點會忍得住對腳唔行入去。

「鳥貴族」全國目前有421間分店，主要集中係關東、關西地區為主，係東京、大阪或京都都周不時望到「鳥貴族」招牌，可見其受歡迎程度。除食物全場均一價外，全場飲品都係280円（未含稅），而且「鳥貴族」唔似一般居酒屋咁有人頭費「お通し」（最低消費），對於對日本居酒屋不熟識嘅外國遊客黎講絕對係一種福音。

「鳥貴族」主打料理以雞肉串燒，全部都均用日本國內産地雞直送方式，保證雞肉新鮮，而且為咗口味一致，店內嘅所有醬汁豉油都係由自家工廠生産製造。

一般分店都比較「爆場」，但係店面唔細，所以一般都唔會等好耐，不過有冇種奇怪現像，唔知係個別定係全部分店都係咁，就係女客人比較多。

入座後，餐牌封面已經打住「280円均一」口號。餐牌一打開，主要料理都係串燒，有成60品以上，一品有2串（可選有鹽、醬油、辣味），除咗串燒，仲有沙律、炸雞、飯、點心同各類飲品。

餐牌最貼心方便嘅地方係大部份食品飲料都附有圖片，唔明講乜都唔緊要，方便遊客「動手不動口」，減低叫錯嘅機會。

如果兩個人，平均每個人叫一杯飲品、3至4品食物，大約都係1500円（未含稅），計番港紙$100蚊有找，而且味道唔錯，絕對係物超所值，值得一試再試！

官網：https://www.torikizoku.co.jp/menu/yakitori